Омодагии Резервати бисоферии "Ромит" ба ташрифи намояндагони корпуси дипломатӣ ва созмонҳои байналмилалӣ                                             

Шиносоӣ ва омӯхтани объектҳои табиии беназири Ҷумҳурии Тоҷикистон аз ҷониби шаҳрвандони хориҷӣ барои ташвиқу тарғиби табиати беназири кишвар ва рушди сайёҳии экологӣ дар Тоҷикистон мусоидат менамояд.

Бо ин мақсад, Кумитаи ҳифзи муҳити зисти назди Ҳукумати Ҷумҳурии Тоҷикистон ташриф овардани роҳбарони корпусҳои дипломатӣ ва ташкилотҳои байналмилалии дар Ҷумҳурии Тоҷикистон фаъолияткунандаро ҷиҳати шиносоӣ бо захираҳои бойи табиӣ ва олами набототу ҳайвоноти беназир, ба яке аз нодиртарин мавзеъҳои табиии кишвар – Резервати биосферии "Ромит", ки соли 1959 таъсис ёфтааст, дар рӯзи 1 июли соли 2022 ба нақша гирифтааст.

Умедворем, ки дар доираи ин сафар шиносоии намояндагони давлатҳои хориҷӣ ва созмонҳои байналмилалӣ бо табиати нотакрори Тоҷикистон ба меҳмонон таассуроти хуб гузошта, дарвоқеъ барои шуҳрати бештар пайдо кардани боигариҳои табиии Ватани маҳбубамон, аз ҷумла шомил шудани мамнӯъгоҳи мазкур ба руйхати ҷаҳонии резерватҳои биосферии ЮНЕСКО мусоидат хоҳад кард.

Ёдовар мешавем, ки аз ҷониби шахсони мутасаддии Кумита ҷиҳати оммавигардонӣ ва таблиғи сайёҳии экологӣ дар Тоҷикистон бо 3 забон буклет омода карда шудааст, ки он ба меҳмонон ҳамчун роҳнамо хизмат хоҳад кард. Ҳамзамон, иштирокчиёни ин сафар аз хизмати роҳбаладҳо ва тарҷумонҳои забонҳои русӣ ва англисӣ баҳравар хоҳанд гашт.

Маълум менамоем, ки майдони ҳудудҳои табиии махсус муҳофизатшавандаи Ҷумҳурии Тоҷикистон ба ҳолати 1 январи соли 2022 3, 1 млн. га-ро ташкил медиҳад, ки ин 22% ҳудуди Тоҷикистонро дар бар мегирад.