Назорати давлатӣ дар самти сайди ғайриқонунии моҳӣ                                           

Дар рӯзҳои охири баргузории чорабиниҳои ҳифзи захираҳои моҳӣ дар давраи тухмгузории соли 2022, аз ҷониби нозирони Сарраёсати ҳифзи муҳити зисти вилояти Суғд дар минтақаи Чилмаҳрами болооби обанбори Баҳри Тоҷик, ки дар ҳудуди ноҳияи Ашт воқеъ аст, амалиёти фаврии муштарак гузаронида шуд. Дар рафти амалиёти мазкур сокини деҳаи Гулшани ҷамоати деҳоти Шодобаи ноҳияи Ашт Ниёзматов Холмат барои бо аслиҳаи манъшуда - шасти барқӣ (электроудочка) ғайриқонунӣ сайд кардани 50 сар моҳии навъҳои гуногун боздошт гардид.

Ҳамзамон, боз як сокини деҳаи Булоқи ҷамоати деҳоти Шодобаи ноҳияи Ашт Ғаниев Мадамин, ки бо сайди ғайриқонунии моҳӣ бо тӯри лескагӣ машғул буд, боздошт карда шудааст. Ҳангоми боздошт 18 адад моҳии ғайриқонунӣ сайдшуда ошкор гардид.

Нисбати шаҳрвандон Ниёзматов Х. ва Ғаниев М. маводи зарурӣ тартиб дода шуда, барои оғози парвандаи ҷиноӣ тибқи моддаи 230-и Кодекси ҷиноии Ҷумҳурии Тоҷикистон ба Прокуратураи вилояти Суғд пешниҳод гардид.