Мизи мудаввар дар мавзуи “Маблағгузории иқлимӣ ва ҷалби бахши хусусӣ дар ҳалли масъалаҳои тағйирёбии иқлим»                                         

21 июни соли ҷорӣ дар меҳмонхонаи “Хилтон”-и шаҳри Душанбе бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Барномаи рушди СММ ва Дафтари Британияи Кабир оид ба рушд дар Осиёи Марказӣ ҷаласаи якуми гурӯҳии кории байниидоравӣ оид ба таҳияи Нақшаи амал оид ба татбиқи “Стратегияи миллии мутобиқшавӣ ба тағйирёбии иқлими Ҷумҳурии Тоҷикистон” баргузор гардид.

Дар ҷаласа муовини якуми раиси Кумитаи ҳифзи муҳити зити назди Ҳукумати Ҷумҳурии Тоҷикистон Қиёмзода Зарафо Суфиҷон иштирок ва суханронӣ намуд.

Намояндагони вазорату идораҳо, ки аъзои гурӯҳи корӣ дар таҳияи Нақшаи амал оид ба татбиқи “Стратегияи миллии мутобиқшавӣ ба тағйирёбии иқлими Ҷумҳурии Тоҷикистон” мебошанд, масъалаи мавриди назарро мавриди баррасӣ қарор дода, барои такмил додани он фикру мулоҳизаҳои худро баён доштанд.

Ҳадаф аз баргузории ҷаласаи мазкур ин муаррафӣ намудани имкониятҳои дастарасии вазорату идораҳои дахлдор, бонкҳои тиҷоратӣ ва бахши хусусӣ ба сарчашмаҳои гуногуни маблағгузорӣ аз фондҳои махсуси иқлимӣ (грантҳо ва қарзҳои имтиёзнок) барои татбиқи лоиҳаҳои афзалиятноки миллӣ дар самти мутобиқшавӣ ва коҳиш додани таъсири манфии тағйирёбии иқлим, инчунин коҳиш додани ихроҷи газҳои гулхонаӣ тавассути ҷорӣ намудани технологияҳои аз ҷиҳати экологӣ тоза мебошад.