Маҷлиси тантанавӣ бахшида ба 50-солаии таъсисёбии Рӯзи умумиҷаҳонии муҳити зист                                 

5 июни соли ҷорӣ дар маҷлисгоҳи дастгоҳи марказии Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба Рӯзи байналмилалии муҳити зист чорабинии тантанавӣ баргузор гардид. Чорабинии идонаро муовини раиси Кумита Мавлодод А. М. оғоз бахшида, матни табрикотии раиси Кумитаро ба муносибати ин ҷашни муҳимми соҳавӣ, ки мақоми байналмилалӣ дорад, қироат намуд.

Рӯзи байналмилалии муҳити зист чун иқдоми байналмилалӣ аз «Муроҷиатномаи Ментовӣ» ба Котиби генералии СММ сарчашма гирифта, 11 майи соли 1971 аз ҷониби 2200 нафар ходимони илму фарҳанги 23 кишвари ҷаҳон ба имзо расидааст. Соли 1972 дар пойтахти Шведсия-шаҳри Стокголм Конфронси умумиҷаҳонӣ оид ба ҳифзи муҳити зист доир гашт ва дар кори он намояндагони 113 кишвари олам иштирок намуданд. Дар конфронси мазкур барои ҳамасола таҷлил намудани 5-уми июн, ҳамчун Рӯзи умумиҷаҳонии муҳити зист, қарор қабул карда шуд. Имсол 50 сол мешавад, ки бо ташаббуси Барномаи СММ оид ба муҳити зист (ЮНЕП) дар ҳамаи кишварҳои ҷаҳон, аз ҷумла дар Ҷумҳурии соҳибистиқлоли Тоҷикистон, бо мақсади мусоидат намудан ба беҳдошти вазъи муҳити зист ҳар сол 5 июн чун Рӯзи умумиҷаҳонии муҳити зист дар сатҳи баланд таҷлил карда мешавад.

Дар чорабинии имрӯза як қатор кормандону собиқадорони мақомоти ҳифзи муҳити зист, кормандони воситаҳои ахбори омма, ки дар татбиқи сиёсати экологии кишвар саҳми арзанда гузоштаанд, бо ифтихорномаю сипосномаҳо сарфароз гардонда шуданд.

Тибқи қарори мақомоти иҷроияи маҳаллии ҳокимияти давлатӣ дар ҷойҳо бо ҷалби табақаҳои гуногуни ҷомеа, аз ҷумла бо иштироки сохторҳои вазорату идораҳо, ташкилоту муассисаҳо, аз ҷумла донишҷӯёну хонандагон, нозирони сабз чорабиниҳои экологӣ ба нақша гирифта шуда, дар ҳудуди вилоятҳо, шаҳру ноҳияҳои ҷумҳурӣ ин санаи экологӣ дар сатҳи баланд гузаронида мешаванд, ки барои баланд бардоштани сатҳи маърифати экологии табақаҳои гуногуни аҳолӣ мусоидат менамояд.