Дар ҷаласаи навбатии ҳарҳафтаинаи Кумита                 

30 майи соли 2022 ҷаласаи навбатии ҳарҳафтаинаи раиси Кумита оид ба натиҷаҳои фаъолияти ҳафтаи аз 23 то 27 майи сохторҳои Кумита ва зерсохторҳои он ва супоришҳо барои ҳафтаи ҷорӣ баргузор гашт.

Пас аз ифтитоҳи кори ҷаласа аз ҷониби муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон Қиёмзода Зарафо Суфиҷон сардори Раёсати мониторинг, сиёсати экологӣ, кадастр ва обуҳавошиносӣ Шукуров И. бо маърӯзаи ҳисоботии таҳлилӣ баромад намуда, натиҷаҳои фаъолияти ҳафтаинаи мақомоти соҳавиро пешниҳод намуд.

Вобаста ба гузориши ҳисоботии маърӯзачӣ муовини якуми раиси Кумита Қиёмзода З.С. масъалаҳои ҷории фаъолияти сохторҳоро аз масъулон пурсон шуда, дар ин баробар барои бартараф намудани камбудиҳои ҷойдошта оид ба пешбурди назорати давлатӣ ва дигар самтҳои марбутаи фаъолияти сохторҳои соҳавӣ супоришҳои мушаххас дод.

Ҳамзамон, муовини якуми раиси Кумита оид ба омодагиҳои мутасаддиён вобаста ба чорабинии сатҳи баланди Даҳсолаи байналмилалии амал “Об барои рушди устувор, солҳои 2018-2028” ва 50-солагии таҷлили Рӯзи байналмилалии муҳити зист, ки нимаи аввали моҳи июни соли ҷорӣ дар назар дошта шудааст, ба иҷрокунандагон дастурҳо дод.

Дар охир, вобаста ба баррасии масъалаҳои ҷорӣ, таклифу пешниҳодҳо ва супоришҳои додашуда қарори дахлдор қабул карда шуд, ки барои корбарӣ ба масъулони дахлдори соҳавӣ фиристода мешавад.