Суханронии раиси Кумита дар ҷаласаи сеюми сарони вазорату идораҳои давлатҳои аъзои СҲШ                

27 майи соли равон раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон дар Ҷаласаи сеюми роҳбарони вазорату идораҳои давлатҳои аъзои Созмони ҳамкории Шанхай оид ба масъалаҳои экологӣ дар шаҳри Тошканти Ҷумҳурии Ӯзбекистон суханронӣ намуд. Зимни суханронӣ ӯ қайд намуд, ки Ҳукумати Ҷумҳурии Тоҷикистон сарватҳои табиӣ ва нигоҳдории он барои наслҳои ояндаро баҳри ҳифзу афзун намудани сарватҳои табиие, ки ба беҳбудии мардум, ба хусус наслҳои оянда бевосита вобаста аст, зери таваҷҷуҳи доимии хеш қарор додааст.

Бо ташаббуси Ҷумҳурии Тоҷикистон Маҷмаи Умумии СММ Даҳсолаи байналмилалии амал «Об барои рушди устувор, солҳои 2018-2028»-ро эълон кард, ки дар пасманзари таъсири рӯзафзуни тағйирёбии иқлим, таназзули муҳити зист, рушди демографӣ, буҳронҳои ғизоӣ ва энергетикӣ мо бояд баҳри ҳифз ва истифодаи оқилонаи об ва дигар захираҳои табиӣ кӯшишҳои зиёд ба харҷ диҳем. Рушди ҳамкорӣ, шарикӣ ва дипломатияи об метавонад ба андешидани саривақтии чораҳои зарурӣ ҷиҳати рафъи оқибатҳои равандҳои манфии экологӣ, ки ба ноил шудан ба Ҳадафҳои Рушди Устувор мусоидат мекунанд, мусоидат намояд.

Бори нахуст Презденти Ҷумҳурии Тоҷикистон муҳтарам Эмомалӣ Раҳмон бо ташаббуси таъсиси Хазинаи байналмилалии ҳифзи пиряхҳо баромад намуда, пешниҳод карданд, ки соли 2025 Соли байналмилалии ҳифзи пиряхҳо эълон шуда, санаи Рӯзи ҷаҳонии пиряхҳо таъйин карда шавад.

Ҳамчунин пешниҳод шуд, ки кишварҳои узви Созмони ҳамкориҳои Шанхай аз ин иқдоми Тоҷикистон пуштибонӣ намояд, ки механизми маблағгузории тарҳҳои ҳифзи пиряхҳоро тавассути ироаи кумакҳои бебозгашти муносиб ба афроди воқеӣ ва ҳуқуқӣ эҷод мекунад. Муттаҳидкунии маблағҳои аз донорҳои гуногун бадастомада ба Хазинаи байналмилалии ҳифзи пиряхҳо имкон медиҳад, ки лоиҳаҳои барои минтақа аҳамияти калондошта маблағгузорӣ шуда, ба ин васила ба вазъи муҳити зист ва дар маҷмӯъ, ба соҳаи иқтисодӣ ва иҷтимоӣ таъсири мусбат расонанд.

Дар ҷамъбаст аз ҷониби раиси Кумита аҳамияти талошҳои муштараки кишварҳои узви СҲШ дар татбиқи нақшаи чорабиниҳо оид ба татбиқи Консепсияи ҳамкории давлатҳои аъзои Созмони ҳамкории Шанхай дар соҳаи ҳифзи муҳити зист барои солҳои 2022-2024 таъкид карда шуд.