Конфронс бахшида ба Рӯзи байналмилалии гуногунии биологӣ "Сохтани ояндаи умумӣ барои ҳаёти мо"            

21-уми майи соли 2022 дар шаҳри Душанбе бо ташаббуси Маркази миллии гуногунии биологӣ ва бехатарии биологии Кумитаи ҳифзи муҳити зисти назди Ҳукумати Ҷумҳурии Тоҷикистон ҳамчун мақоми ваколатдор оид ба татбиқи Конвенсияи СММ дар бораи Гуногунии биологӣ, бахшида ба Рӯзи байналмилалии гуногунии биологӣ конфронс баргузор гардид, ки ҳамасола 22 май бо ташаббуси Конвенсия оид ба гуногунии биологӣ таҷлил мегардад.

Ҳар сол Конвенсияи гуногунии биологӣ мувофиқи ҳадафу вазифаҳо Рӯзи гуногунии биологиро аз рӯи мазуъҳои алоҳида ҷашн мегирад. Соли 2022 соли "Сохтани ояндаи муштарак барои ҳаёти мо" эълон шудааст. Ин шиорро Котиботи Конвенсия моҳи марти соли 2022 дар ҷаласаи техникии тарафҳои Конвенсия қабул кардааст.

Намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон, Академияи миллии илмҳои Тоҷикистон ва муассисаҳои махсуси он, намояндагони Академияи илмҳои кишоварзии Тоҷикистон ва муассисаҳои соҳавии он, Агентии хоҷагии ҷангал ва Муассисаи давлатии “Ҳудудҳои табиии махсус ҳифзшаванда”, намояндагони донишгоҳҳои миллии Тоҷикистон, аграрӣ, омӯзгорӣ, Донишгоҳи давлатии Хуҷанд, намояндагони ташкилотҳои ҷамъиятӣ ва хоҷагиҳои деҳқонӣ дар кори Конфронс иштирок намуданд.

Бо сухани ифтитоҳӣ муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон Қиёмзода Зарафо Суфиҷон баромад кард, ки дар он дастовардҳои Тоҷикистон дар соҳаи ҳифз ва идоракунии устувори гуногунии биологӣ, сиёсати мамлакат ва нақши Кумита дарҷ шуданд.

Аз ҷониби кормандони Маркази миллии гуногунии биологӣ ва бехатарии биологӣ оид ба Конвенсия оид ба гуногунии биологӣ, сохтор ва принсипҳои ҳамкориҳои байналмилалӣ ва нақши Тоҷикистон дар татбиқи Конвенсия оид ба гуногунии биологӣ ва ноил шудан ба ҳадафҳои калидӣ 3 рӯнамо пешниҳоди иштирокдорон гаштанд.

Дар анҷоми кор қарори Конфронс қабул карда шуд, ки дар он қадамҳо ва амалҳои минбаъда ҷиҳати ноил шудан ба ҳадафу вазифаҳо дар соҳаи идоракунии устувори гуногунии биологӣ, сиёсати кишвар вазифаҳои сатҳи миллӣ ва байналмилалӣ инъикос ёфтанд.