Мизи мудаввар дар мавзӯи «Нақши Китоби сурх дар ҳифзи гуногунии биологӣ ва истифодаи оқилонаи захираҳои табиӣ»

18 май дар ш. Душанбе аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Академияи миллии илмҳои Тоҷикистон бо дастгирии Ҷамъияти ҳамкории байналмилалӣ (GIZ) Мизи мудаввар дар мавзӯи «Нақши Китоби сурх дар ҳифзи гуногунии биологӣ ва истифодаи оқилонаи захираҳои табиӣ» баргузор карда шуд.

Дар кори Мизи мудаввар беш аз 50 нафар коршиносон аз Кумитаи ҳифзи муҳити зисти назди Ҳукумати Ҷумҳурии Тоҷикистон, вазорату идораҳои дахлдор, муассисаҳои илмии Академияи миллии илмҳои Тоҷикистон, Донишгоҳи давлатии Хуҷанд ба номи Б.Ғафуров, Донишгоҳи давлатии Бохтар ба номи Н.Хусрав, Донишгоҳи давлатии Кӯлоб ба номи А.Рӯдакӣ ва дигар муассисаҳои илмии тахассусӣ ва донишгоҳҳои Ҷумҳурии Тоҷикистон иштирок намуданд.

Мизи мудавварро муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон Қиёмзода Зарафо бо сухани ифтитоҳӣ оғоз намуда, дар он ноиби президенти Академияи миллии илмҳои Тоҷикистон, узви вобастаи Академияи миллии илмҳои Тоҷикистон Саидов Абдусаттор баромад намуд.

Дар Мизи мудаввар 3 маърӯза шунида шуд, аз ҷумла муҳимтарин дастовардҳои Кумитаи ҳифзи муҳити зисти назди Ҳукумати Ҷумҳурии Тоҷикистон ва Академияи миллии илмҳои Тоҷикистон дар соҳаи ҳифзи намудҳои нодир ва зери таҳдиди хатари маҳвшавӣ қарордоштаи набототу ҳайвонот, мақоми ҳифз ва меъёрҳои муайян намудани намудҳои нодир ва зери таҳдиди маҳвшавӣ қарордоштаи набототу ҳайвонот барои ворид намудан ба Китоби сурхи Тоҷикистон ва минтақаҳои калидии гуногунии биологӣ пешниҳод гардиданд.

Маърӯзаҳо ва баромадҳои дар Мизи мудаввар пешниҳодгардида ва масъалаҳои баррасигардида оид ба ҳифзи намудҳои нодир ва зери таҳдиди маҳвшавӣ қарордоштаи набототу ҳайвонот хеле муҳим буда, барои ба нақшагирии чорабиниҳо оид ба пешбурди Китоби сурхи Ҷумҳурии Тоҷикистон аҳаммияти муҳими амалӣ доранд.

Дар фарҷоми мизи мудаввар Қарордод қабул гардида дар он самтҳои ҳамкориҳои баъди дар таҳия ва нашри нави Китоби сурхи Ҷумҳурии Тоҷикистон муайян ва қабул карда шуданд.