Баргузории аксияҳои навбатии “Тозагии маҳал” дар ВМКБ

Сарраёсати ҳифзи муҳити зист дар ВМКБ ҷиҳати иҷрои фармоиши раиси Кумитаи ҳифзи муҳити зисти назди Ҳукумати Ҷумҳурии Тоҷикистон аз 14 январи соли 2022, №2 бо мақсади сазовор пешвоз гирифтани ҷашнҳои миллию давлатӣ, тозаю озода нигоҳ доштани кӯчаю паскӯчаҳо ва ҷалби шаҳрвандон дар беҳтар намудани вазъи экологӣ вобаста ба баргузор намудани аксияи «Тозагии маҳал-2022» корҳои зиёдеро ба анҷом расонид.

Аз тарафи мутахассисони Сарраёсати ҳифзи муҳити зист дар вилоят 7-уми майи соли ҷорӣ бо иштироки 30 нафар кормандони идораю муассисаҳо аксияи «Тозагии маҳал» баргузор гардид. Дар ин аксия ҳудуди боғи фарҳангию фароғатии шаҳри Хоруғ дар масофаи 1км аз партовҳои ҳархела тоза карда шуда, ба миқдори 1,3м3 партов ба партовҷо бароварда шуд.

Аз тарафи мутахассисони бахши ҳифзи муҳити зист дар ноҳияи Роштқалъа бошад, дар санаи мазкур аксияи «Тозагии маҳал» бо иштироки 40 нафар хонандагон дар деҳаи Шодии ҷамоати деҳоти Қ. Гадоалиев баргузор гардид. Дар ин аксия ҳудудҳои муайяни деҳаи мазкур дар масофаи 60м аз партовҳои ҳархела тоза карда шуда, ба миқдори 3,5м3 партов ба партовҷо бароварда шуд.

Дар аксияҳои гузаронидашуда 70 нафар сокинон иштирок намуда, масофаи 1,60 аз партовҳои ҳархела тоза карда шуда, 4,8м3 партов ба партовгоҳ бароварда шуд.