Ааксияи  “Тозагии соҳил” дар ноҳияи Фирдавсии шаҳри Душанбе

Баҳри иҷрои фармоиши раиси Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳудуди ноҳияи Фирдавсии шаҳри Душанбе зери роҳбарии Сарраёсати ҳифзи муҳити зисти шаҳри Душанбе аксияи экологии “Тозагии соҳил” баргузор гардид.  

Ҳадаф аз баргузории чунин аксияҳо пеш аз ҳама тоза намудани соҳили дарёву каналҳо, ҷӯйборҳо ва новаҳои обгузар дар шаҳраку маҳаллаҳо буда, иштироки фаъолонаи аҳли ҷамоатчигӣ далели бевоситаи таваҷҷуҳи онҳо ба масъалаҳои тозагии муҳити зист ва баланд бардоштани фарҳанги шаҳрнишинӣ мебошад.

Аснои гузаронидани аксия дар ҳудуди шаҳракҳои 23, 24, 46 ва ҳудуди канали Оққурғон дар масофаи 1600 метри тӯлонӣ тоза кардашуда, дар ҳаҷми 23 м³ партов ҷамъоварӣ ва ба партовгоҳи шаҳрӣ бароварда шуд.

Ҳамчунон, бо мусоидати МД “Раёсати обёрӣ”-и шаҳри Душанбе аз дохили каналу селпартоҳои ҳудуди ноҳияи Фирдавсӣ ба миқдори 8,7 тонна лойқа бароварда шуд.

Гузашта аз ин, зимни баргузории аксия дар шаҳракҳои 23, 24, ва 46-ум бо сокинони шаҳракҳо вобаста ба риояи муқаррароти Қоидаҳои тартиботи ҷамъиятӣ, ободонӣ ва санитарӣ дар шаҳри Душанбе ва талаботҳои қонунгузориҳо дар самти нигоҳдории муҳити зист, махсусан покнигоҳдории соҳили дарёву канал ва манбаъҳои обӣ, муносибати оқилона намудан ба сарватҳои табиӣ аз ҷумла оби нӯшокӣ суҳбатҳо гузаронида шуд.

Тибқи иттилои Раёсати ҳифзи муҳити зисти шаҳри Душанбе ҷиҳати таъмини беҳдошти муҳити зист хосатан соҳили дарёву каналҳо чунин аксияҳо то анҷоми соли ҷорӣ роҳандозӣ мегарданд.