Таҷлили “Рӯзи Президент” аз ҷониби кормандони ҳифзи муҳити зист дар вилояти Хатлон

Ба ифтихори Рӯзи Президенти Ҷумҳурии Тоҷикистон ва Иҷлосияи 16 - уми Шӯрои Олии Ҷумҳурии Тоҷикистон аз ҷониби экологони вилояти Хатлон чорабинии идона доир шуд, ки дар он меҳмонон қабл аз оғози чорабинӣ аз намоиши асарҳои пурғановати Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дигар асарҳои марбут ба кору фаъолияти ин абармарди миллати тоҷик гузошта шуда буд, дидан намуданд. Дар оғози чорабинӣ Мусозода Шодӣ, сардори Сарраёсати ҳифзи муҳити зисти вилояти Хатлон дар назди иштирокдорон баромад намуда, доир ба хизматҳои Пешвои миллат муҳтарам Эмомалӣ Раҳмон дар эъмори давлати навини Тоҷикистони Соҳибистиқлол ва инчунин Иҷлосияи 16-уми Шӯрои Олии Ҷумҳурии Тоҷикистон баромад намуд. Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон Эмомалӣ Раҳмон марди олиму оқилу фозилу хирадмандест, ки давлатро аз фаноёбӣ наҷот дода, мардумро атрофаш муттаҳид ва ба қалби мардумаш шӯълаи умедро бедор ва бо қадамҳои қатъӣ ба сулҳу осоиш, рушду суботи минбаъда ҳидоят намуд - афзуд Мусозода Шодӣ. Ҳамчунин, Самадзода Шоҳрух, мудири бахши ҳифзи муҳити зисти ноҳияи Абдураҳмони Ҷомӣ, оид ба баргузории “Иҷлосияи тақдирсози миллат ва корнамоиҳои абармарди арсаи сиёсат-Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон” маъруза кард. Дар идомаи чорабинӣ Исмоил Гулзода, мудири бахши ҳифзи муҳити зисти ноҳияи Ҷайҳун баромад карда, изҳор дошт, ки суханрониҳои пай дар пайи Президенти мамлакат муҳтарам Эмомалӣ Раҳмон, аз минбари баланди Созмони Милали Муттаҳид ва дигар созмонҳои бонуфузи олам, ташаббусҳои он кас роҷеъ ба ҳалли масъалаҳои глобалӣ шоистаи таҳсин буда, дараҷаи баланди инсондӯстӣ ва сатҳи олии донишу ҷаҳонбинӣ ва дурандешии Пешвои миллати моро нишон медиҳанд. Дар чорабинӣ филми мустанад таҳти унвони «Тулӯи хуршед», ки фарогири ҷанбаҳои фаъолияти пурсамар ва талошҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Рахмон мебошад, манзури иштирокдорон гардонида шуд.