Маҳфили навбатии Эко-журналистон дар мавзеи Искандаркӯл.

Санаи 28 августи соли ҷорӣ маҳфили навбатии экожурнаистон иборат аз 23 нафар таҳти роҳбаладии кормандони Маркази ахбори экологии Кумитаи ҳифзи муҳити зисти назди Ҳукумати Ҷумҳурии Тоҷикистон ба мавзеи Искандаркӯли вилояти Суғд сафар намуданд.
Намояндагони воситаҳои ахбори оммаи аъзои маҳфил нахуст аз тамошои кӯлу шаршара, чашмасорон ва дигар мавҷудоти табиати зебои Искандаркӯл баҳравар гаштанд.
Сипас дар яке аз гӯшаҳои хушманзари мавзеи Искандаркӯл мутахассисони самти марбутаи Кумитаи ҳифзи муҳити зист оид ба фаъолияти Муассисаи давлатии илмӣ-тадқиқотии лабораторияи ҳифзи табиат ва дастовардҳои илмӣ дар ин самт ба аъзоёни маҳфил бозомӯзии навбатиро гузаштанд.
Ҳамзамон дар рафти бозомӯзӣ аз ҷониби мудири Парваришгоҳи Искандаркул Каримов Муродулло дар бораи мавзеи мазкур маълумоти муфассал пешниҳод гардид.
Дар нутқи баромадкунандагони бозомӯзӣ қайд карда шуд, ки Искандаркӯл яке аз зеботарин кӯлҳои Тоҷикистон ва ҳамчунин  калонтарин кӯл дар Ҳисору Олой дар ҳавзаи дарёи Зарафшон аст. Кӯли мазкур дар баландии 2260 метр аз сатҳи баҳр воқеъ буда, майдони   3, 39 км² -ро фаро мегирад ва чуқурии ниҳоии он каму беш 71 метр аст. Ҳарорати оби кӯл дар фасли тобистон 15-18⁰С-ро ташкил медиҳад. Гирду атрофи кӯлро масоҳати густурдаи ҷангалзор бо дарахтон ва гулу гиёҳҳои шифобахши нодир зиннат медиҳад.
Аъзои маҳфили мазкур аз ин гӯшаи зеботарини кишвар таассуроти ғанӣ бардошта, барои иқдоми мазкури Кумитаи ҳифзи муҳити зисти назди Ҳукумати Ҷумҳурии Тоҷикистон, ки дар доираи амалигардонии «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» силсиламаҳфилҳои мавриди назарро роҳандозӣ намудааст, изҳори миннатдорӣ намуданд.
Бо ҳамин маҳфили навбатӣ дар мавзеи Искандаркӯл ба поён расида, гурӯҳи журналистон бо бардошти назариявию амалӣ ба шаҳри Душанбе баргаштанд.