Солҳои охир бо заҳмату талошҳои мардуми меҳнатқарини Хуҷанди бостонӣ ва бо азми роҳбарияти мақомоти иҷроияи ҳокимияти давлатӣ маркази маъмурии вилояти Суғд симои нав ба бар менамояд.

Чанде қабл бо супориши роҳбарияти шаҳри Хуҷанд маконҳои партовгузорӣ бо қуттиҳои ҷамъоварии намуди гуногуни партов таъмин карда шуданд.

Шаҳрвандон минбаъд партовҳоро мувофиқ ба таъйиноти қуттиҳо, ба мисоли хокрӯба, зарфҳои шишагию пластикӣ, оҳан, меваю сабзавот ва ғайраҳо мегузоранд, ки он барои ба навъҳо ҷудо намудани партов мусоидат хоҳад намуд. Зеро дар ояндаи наздик дар назди КВДК «Хизматрасонии нақлиёти санитарии шаҳри Хуҷанд» бунёди корхонаи коркарди партов ба нақша гирифта шудааст.

Аз ҷониби КВДК «Хизматрасонии нақлиёти санитарии шаҳри Хуҷанд», аллакай беш аз 120 намуди чунин қуттиҳо ташкил карда шудаанд, ки ба зебоии шаҳри бостонии Хуҷанд нақши муассир гузоштааст.

Бояд қайд намуд, ки дар шаҳри Хуҷанд 175 адад нуқтаи партов бо 780 адад қуттиҳо мавҷуд буда, ҳамарўза аз ҷониби КВДК «Хизматрасонии нақлиёти санитарии шаҳри Хуҷанд» партовҳо бароварда мешавад.

Бо вуҷуди мушкилоти пешомада, КВДК «Хизматрасонии нақлиёти санитарии шаҳри Хуҷанд» ҳамарӯза дар хизмати шаҳрвандон ва идораву ташкилотҳои шаҳр қарор дошта, дар самти тозаву озода ва ороста нигоҳ доштани шаҳри бостонии Хуҷанд аз тамоми василаҳо истифода менамоянд.