Санаи 27 июли соли ҷорӣ дар меҳмонхонаи “Хаят Реҷенси” дар Душанбе 4-умин Конфронси иқлимӣ натиҷагирӣ карда шуд. Дар доираи кори Конференсия вохӯриҳои дуҷонибаи сатҳи баланд баргузор гардид, ки дар он муовини Сарвазири Ҷумҳурии Тоҷикистон Гулмаҳмадзода Давлатшоҳ Қурбоналӣ иштирок ва суханронӣ намуд. Дар кори ҷамъбастии Конференсия намояндагони роҳбарикунандаи Маркази экологии минтақавии Осиёи Марказӣ ва ҳайати воломақоми кишварҳои иштирокдор таҷрибаи 20-солаи ҳамкориҳои минтақавӣ ва дурнамои ҳамкориҳоро мавриди баррасӣ қарор дода, баҳри ҳамкориҳои минбаъда оид ба масоили минтақавии иқлимӣ ба мувофиқа расиданд.

Дар ҷамъбасти ҳамоиши сатҳи баланд вобаста ба масъалаҳои мавриди назар байни Кумитаи ҳифзи муҳити зисти назди Ҳукумати Ҷумҳурии Тоҷикистон ва Маркази минтақавии экологии Осиёи Марказӣ Ёддошти ҳамкорӣ ба имзо расид.

Ёдовар мешавем, ки ин иқдом аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон дар доираи лоиҳаи Бонки ҷаҳонӣ / ICMFSA «Барномаи мутобиқшавӣ ва коҳиш додани тағирёбии иқлим дар ҳавзаи баҳри Арал» (CAMP4ASB) пеш гузошта шуд. Дар кори Конференсияи сатҳи баланд, ки санаҳои 26-27 июли соли ҷорӣ дар шаҳри Душанбе доир гардид, мутахассисону коршиносони ташкилоту идораҳои давлатӣ, созмонҳои байналхалқиву ҷамъиятӣ ва намояндагони васоити ахбори оммаи кишварҳои Осиёи Марказӣ, дар ҷамъи 300 нафар, иштирок намуданд.

Дар ҷамъбасти ҳамоиши сатҳи баланд вобаста ба масъалаҳои мавриди назар байни Кумитаи ҳифзи муҳити зисти назди Ҳукумати Ҷумҳурии Тоҷикистон ва Маркази минтақавии экологии Осиёи Марказӣ Ёддошти ҳамкорӣ ба имзо расид.

Ёддошт муносибати ҷонибҳоро бо мақсади муқаррар намудани ҳадафҳо ва самтҳои асосии ҳамкорӣ дар табодули иттилоот дар бораи вазъи экологии Осиёи Марказӣ бо мақсади дастгирии Платформаи иттилоотии иқлим дар Осиёи Марказӣ танзим мекунад.