НАМОИШИ ДАСТОВАРДҲОИ КУМИТА ДАР ФЕСТИВАЛ – НАМОИШГОҲИ ҲУНАРҲОИ МАРДУМӢ               

                                          

Бо мақсади таъмини иҷрои чорабиниҳои нақшавии “Фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои соли 2023”, ки бо амри Президенти Ҷумҳурии Тоҷикистон  аз 3 январи соли 2023, №АП-318 тасдиқ гардидааст, санаи 14 сентябри соли ҷорӣ дар Муассисаи давлатии “Боғи фарҳангию фароғатии ба номи Абулқосим Фирдавсӣ”-и шаҳри Душанбе бо ибтикори Вазорати кишоварзии Ҷумҳурии Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе “Намоиши таомҳои миллӣ, идҳои тарбуз, харбуза, каду, себ, ангур ва фестивали Оши палав” баргузор гардид.

Бино ба иттилои АМИТ «Ховар», дар Намоишгоҳи мазкур намояндагони баландпояи Ҷумҳуриҳои Тоҷикистон, Ӯзбекистон ва Туркманистон, роҳбарон ва намояндагони дигар вазорату идораҳо, намояндагону кишоварзони Вилояти Мухтори Кӯҳистони Бадахшон, вилоятҳои Суғду Хатлон ва шаҳру ноҳияҳои тобеи ҷумҳурӣ иштирок намуданд.

Бояд тазаккур дод, ки дар Намоишгоҳи зикршуда дар баробари дигар вазорату идораҳо, ташкилоту муассисаҳо, мақомоти иҷроияи маҳаллии ҳокимияти давлатӣ дастовардҳои Кумитаи ҳифзи муҳити зисти назди Ҳукумати Ҷумҳурии Тоҷикистон, аз қабили хаймаҳои егерӣ, харита ва тамсилаи Мамнуъгоҳи давлатии табиии «Бешаи палангон», лабораторияи сайёр оид ба мониторинги муҳити зист, расму мусаввараҳо ва овезаву шиорҳо ва маводи чопии тарғиботӣ марбут ба самтҳои фаъолияти мақомоти соҳавӣ ба намоиш гузошта шуд.

Тибқи маълумоти Вазорати кишоварзии Ҷумҳурии Тоҷикистон ҳадаф аз баргузории чорабинии мазкур тарғиби рушди маҳсулоти кишоварзӣ, муаррифии дастранҷи деҳқон, эҳё намудани анъанаҳои парвариши  навъҳои  гуногуни тарбуз, харбуза, каду, себ ва ангур  ва намоишу муаррифии таомҳои миллӣ мебошад.