Семинари бозомӯзӣ доир ба истифодаи барномаи смарт нозирӣ дар мониторинги табиати ёбоӣ
Тибқи супориши Раиси Кумитаи ҳифзи муҳити зист ва нақшаи кории Маркази милли амалҳо дар ҳамкорӣ бо Маркази миллии гуногунӣ ва бехатарии биологӣ дар шаҳри Душанбе семинари омӯзишӣ доир ба истифодаи барномаи мобилии СМАРТ нозирӣ бо иштироки 20 нафар мутахассисони Кумитаи ҳифзи муҳити зисти назди Ҳукумати Ҷумҳурии Тоҷикистон, Академияи миллии илмҳо, Муассисаи давлатии ҳудудҳои табиии махсус муҳофизатшаванда ва Марказҳои зерсохтори Кумита доир карда шуд. Дар семинари омӯзишӣ мушовири байналмилалӣ аз Фонди Табиати Ваҳшӣ Карнаухов Александр доир ба тарзи истифодаи барномаи мобилии смарт нозирӣ дар гузаронидани мониторинги табиат ва ба ҳисобгирии ҳайвоноти ёбоӣ ва тарзи насбу истифода намудани домҳои банаворгирӣ ва истифодаи маълумотҳо дар таҳияи ҳисоботҳои мониторингӣ омӯзиш гузаронида шуд. |
|
Инчунин рӯзҳои 25 ва 26 августи соли ҷорӣ дар ноҳияҳои Сангвор ва Лахш бо иштироки 40 нафар кормандону ҷангалбонони боғҳои миллии Сангвор ва Лахш семинарҳои омӯзишӣ доир ба истифодаи барномаи мобилии смарт нозирӣ доир карда шуд. Дар семинарҳои омӯзишӣ иштирокдорон барномаи смарт нозириро дар телефонҳои мобилии худ насб намуда, дар шароити саҳроӣ доир ба тарзу истифодаи он, гузаронидани мониторинг ва ҳисоботи саршумори ҳайвоноти ёбоӣ, пайдо намудани маълумотҳои мониторингӣ аз махзани маълумотҳо, харитасозӣ ва истифодаи маълумотҳоро аз домҳои банаворгирӣ омӯхтанд. |