Озмуни беҳтарин муассисаи таълимӣ ҷамъбаст гардид
Имсол озмуни мазкур дар доираи таҷлили 30-солагии Истиқлолияти давлатии Ҷумҳурии Тоҷикистон дар сатҳи ноҳиявӣ ва шаҳрӣ баргузор гашта, муассисаҳои таълимӣ ва томактабии ноҳияҳои И.Сомонӣ, Сино, Фирдавсӣ ва Шоҳмансур барои дарёфти мақоми аввал ва “Диплом”-и мақомоти иҷроияи ҳокимияти давлатии шаҳри Душанбе рақобат карданд.
Тибқи маълумоти Раёсати ҳифзи муҳити зисти шаҳри Душанбе вобаста ба тақвияти корҳои ободонӣ, ниҳолшинонӣ, гулшинонӣ, сабзазоркунӣ ва ҷиҳати иҷрои қарори Раиси шаҳри Душанбе “Дар бораи тасдиқи Нақшаи чорабиниҳо оид ба ниҳолшинонию сабзкорӣ дар мавсими тирамоҳи соли 2020 ва баҳори соли 2021 дар шаҳри Душанбе” дар ҳудуди муассисаҳои таълимӣ ба миқдори 17291 бех ниҳол аз ҷумла, 8723 бех ниҳоли ороишӣ, 3454 бех ниҳоли сояафкан, 2749 бех ниҳолҳои буттагӣ, 2365 бех ниҳолҳои мевадиҳанда, 145370 дона гул, 53733 дона гули лола шинонида шуда, дар майдони 4754 м2 майсазор кишт карда шудааст.
Дар доираи таҷлили Рӯзи омӯзгор дар Кохи Суруш бо ҳузури муовини вазири маориф ва илми Ҷумҳурии Тоҷикистон Ғанизода Гулчеҳра, муовини Раиси шаҳри Душанбе Мавсума Муинӣ ва Исмоилзода Баҳром, сардори Сарраёсати маорифи шаҳри Душанбе ҷамъомади тантанавӣ доир гардид.
Дар ҷараёни чорабинӣ, аз ҷониби масъулони вазорати маориф ва илми Ҷумҳурии Тоҷикистон ва мақомоти иҷроияи ҳокимияти давлатии шаҳри Душанбе муассисаҳои таҳсилоти миёнаи умумии № 55, 99, 1 ва муассисаҳои томактабии 24, 65 ва 141 бо мақомҳои ифтихорӣ ва “Диплом”-и мақомоти иҷроияи ҳокимияти давлатии шаҳри Душанбе сарфароз гардонида шуданд.
Бояд ёдовар шуд, ки озмуни имсола дар муқоиса ба озмунҳои солҳои қаблӣ беҳтару хубтар ба роҳ мондашуда, маъмурини муассисаҳои таълимӣ дар баробари бо сифат анҷом додани корҳои ободонӣ ҳамчунон дар вақти шинонидани гулу сабза ва ниҳол қоидаҳои агротехникиро риоя намуда, дар ҳолати ба касалиҳои занбуруғӣ дучор омадани дарахтон коркарди кимиёвӣ гузарониданд.
Роҳандозӣ намудани озмуни “Беҳтарин муассисаи таълимӣ дар самти корҳои ободонӣ “ агар таваҷҷӯҳи аҳли маорифро ба корҳои ободонию сабзкорӣ ҷалб намояд, аз ҷониби дигар бо тақвияти корҳои ободонӣ як гӯшаи шаҳри азизамон ободу зебо гашта, дар сарсабзии пойтахти кишварамон-шаҳри Душанбе нақши муҳим мебозад.