Фестивал таҳти унвони “Ҳифзу нигоҳдории озодапаланг тавассути ҷалби экосайёҳ”
Дар асоси нақшаи чорабиниҳои Кумитаи ҳифзи муҳити зисти назди Ҳукумати Ҷумҳурии Тоҷикистон ва мақомоти иҷроияи ҳокимияти давлатӣ дар ВМКБ аз соли 2015 инҷониб ҳамасола дар вилояти мазкур фестивали “Дӯстдорони табиати ваҳшӣ” баргузор мегардад.
Имсол низ фестивали мавриди назар таҳти унвони “Ҳифзу нигоҳдории озодапаланг тавассути ҷалби сайёҳон” дар ҷамоати Зонги ноҳияи Ишкошим баргузор гардид. Дар чорабинӣ муовини раиси вилоят Н. Асламшоева, сардори Сарраёсати ҳифзи муҳити зист дар ВМКБ Назаралиев М., роҳбари ҷамъияти “Кӯҳҳои Помир” Қурбол Аламшо ва дигар масъулону кормандони ҳифзи муҳити зисти вилоят, ноҳияи Ишкошим, кормандони сохторҳои мақомоти давлатӣ ва дӯстдорони табиат иштирок намуданд.
Хонандагони муассисаҳои таҳсилоти миёнаи умумии №1 деҳаи Вранги ноҳияи Ишкошим дар бораи ноҳия, харитаи деҳа, чашмаҳо, гиёҳҳои шифобахши диёри худ барои меҳмонон ба таври муфассал маълумот доданд. Дар чорабинӣ ҳунарҳои мардумӣ ва таомҳои миллӣ ба намоиш гузошта шуд. Инчунин, мутахассисон оид ба ҳайвоноти нодир ва маданияти шикор баромадҳо намуданд.
Дар фестивал масъулони соҳавӣ оид ба вазъи экологии ноҳияи Ишкошим суханронӣ намуда, истифодаи оқилонаи захираҳои табиӣ, баланд бардоштани сатҳи маърифати экологии аҳолӣ, зиёд намудани ҳайвонот ва растаниҳои нодир суханронӣ намуданд.
Дар қисмати дигари фестивал барои фаъолияти пурсамар ва назорати доимии ризокорон ва собиқадорони деҳа бо туҳфаҳои хотиравӣ аз ҷониби саррдори Сарраёсати ҳифзи муҳити зисти вилоят сарфароз гардонида шуданд.
Дар интиҳо барномаи фараҳангӣ ба фестивал ҳусни расо бахшид.